Buddsoddiad Cam 1 wedi'i ddatgloi ar gyfer prosiect trawsnewidiol yn CyDA

Ar 25 Mehefin, cymeradwyodd Bwrdd Tyfu Canolbarth Cymru gymorth ar gyfer gwaith dylunio a manylebau manwl i ddod ag elfennau allweddol o'r prosiect trawsnewidiol hwn i'r pwynt cyflawni.

Mae hyn yn cynnwys:

• Ailfodelu sylweddol a diogelu adeilad WISE (Sefydliad Cymru ar gyfer Addysg Gynaliadwy) i'r dyfodol

• Adnewyddu Bythynnod y Chwarel

• Uwchraddio sylweddol i Theatr Byrnau Gwellt

Mae pob elfen yn chwarae rôl hanfodol wrth gryfhau cynnig addysgol ac ymwelwyr CyDA. Bydd y cam hwn hefyd yn ystyried strategaethau adfywiol ar draws y safle ar gyfer gwelliannau ynni, dŵr, gwastraff a seilwaith.

Mae'r gweithiau cynnar hyn yn rhan o gynllun ehangach i ail-ddychmygu CyDA fel canolfan o'r radd flaenaf ar gyfer cynaliadwyedd, dysgu a chymuned - gan wella ei rôl fel catalydd ar gyfer gweithredu ar hinsawdd ac arloesedd gwyrdd.

Mae prosiect datblygu Cynefin CyDA yn fenter mawr newydd sydd wedi'i chynllunio i wella ei safle, ei chyfleusterau a'i heffaith - gan greu canolfan fywiog ar gyfer dysgu, arloesi a chymuned sydd wedi'i wreiddio yn niwylliant a thirwedd Cymru. Nod y prosiect yw cefnogi pontio cyfiawn i ddyfodol di-garbon trwy fynediad estynedig, cydweithredu, ac addysg cynaliadwyedd yn seiliedig ar le.

Nid yw'r buddsoddiad cychwynnol hwn yn ymwneud ag uwchraddio ffisegol yn unig - mae'n ymwneud â galluogi dyfodol cynaliadwy. Bydd gwella amgylcheddau dysgu, cynyddu capasiti llety, a seilwaith sy'n diogelu i'r dyfodol yn helpu CyDA i ddenu mwy o fyfyrwyr ôl-raddedig, croesawu ystod ehangach o ymwelwyr, a dangos arweinyddiaeth hinsawdd trwy ei weithrediadau.

Mae prosiect Cynefin yn adlewyrchu uchelgais rhanbarth Canolbarth Cymru i arwain ym maes arloesedd gwyrdd. Trwy greu profiad  ysbrydoledig a hygyrch i ymgolli ynddo ar gyfer dysgwyr, twristiaid a gwneuthurwyr newid, bydd yn gyrru nifer yr ymwelwyr a thwf economaidd yn yr ardal, tra hefyd yn cefnogi gwaith hanfodol i fynd i'r afael â newid yn yr hinsawdd.

Dywedodd Eileen Kinsman, Cyd-Brif Swyddog Gweithredol y Ganolfan Technoleg Amgen: "Rydym yn falch iawn o dderbyn y gefnogaeth hon drwy Fargen Twf Canolbarth Cymru. Mae'n dod â hyder o'r newydd i'n gweledigaeth ac yn ein galluogi i ddechrau gwneud gwaith uwchraddio sylweddol i'n hadeilad WISE unigryw. Mae Cynefin yn ymwneud â dychmygu dyfodol di-garbon ac adeiladu'r rhwydweithiau, y sgiliau a'r gofodau i helpu i wneud iddo ddigwydd. Mae hwn yn gam hanfodol i sicrhau bod CyDA yn parhau i ysbrydoli, addysgu ac arwain y ffordd ar atebion hinsawdd - yn rhanbarthol a thu hwnt."

Dywedodd Cyd-gadeiryddion Bwrdd Tyfu Canolbarth Cymru, y Cynghorydd Bryan Davies, Arweinydd Cyngor Sir Ceredigion a'r Cynghorydd Jake Berriman, Arweinydd Cyngor Sir Powys: "Mae hon yn foment bwysig i Ganolbarth Cymru. Mae prosiect Cynefin nid yn unig yn diogelu ased rhanbarthol allweddol ond hefyd yn gwella ein gallu i arwain mewn arloesedd carbon isel, addysg a thwristiaeth gynaliadwy. Rydym yn falch o gefnogi'r cam cyntaf hwn yn yr hyn sy'n addo i fod yn daith gyffrous."

Dywedodd Ysgrifennydd y Cabinet dros yr Economi, Ynni a Chynllunio, Rebecca Evans: "Gyda chefnogaeth Llywodraeth Cymru, mae Bargen Twf Canolbarth Cymru yn arwain y ffordd wrth ddatblygu atebion sydd o fudd i bobl a'r blaned, creu economi ranbarthol fwy gwydn a mynd i'r afael â'n heriau amgylcheddol mwyaf dybryd. Bydd prosiect Cynefin nid yn unig yn darparu manteision gwirioneddol i'n cymunedau ond hefyd yn cryfhau economi werdd y rhanbarth."

Dywedodd y Fonesig Nia Griffith DBE AS, Is-ysgrifennydd Gwladol Seneddol Cymru: "Mae Llywodraeth y DU yn falch o'n buddsoddiad ym Margen Twf Canolbarth Cymru ac mewn prosiectau fel Cynefin sy'n cefnogi swyddi, addysg ac arloesedd lleol.

Ein prif genhadaeth yw rhoi hwb i dwf economaidd ym mhob cornel o Gymru. Dyma enghraifft wych arall o sut mae Bargen Twf Canolbarth Cymru yn helpu i gyflawni'r genhadaeth honno a chyfrannu at ddyfodol cynaliadwy."

Mae dull graddol yn golygu bod y prosiect yn cael ei gyflawni mewn camau rheoladwy, gan ddatgloi cyllid ar gamau allweddol o ddatblygiad. Wrth i'r prosiect fynd yn ei flaen, bydd camau'r dyfodol yn gwella gallu CyDA ymhellach i ddarparu dysgu i ymgolli ynddo, cefnogi datblygiad sgiliau gwyrdd a chroesawu cymuned ehangach o ymwelwyr a gwneuthurwyr newid.